स्त्रिया आणि आरोग्य या क्षेत्रात संसाधन निर्मिती आणि संवर्धनाचे उद्दिष्ट ठेवून तथापि ट्रस्ट ही संस्था १९९९ साली स्थापन करण्यात आली. त्या आधी राज्यभरातील कार्यकर्त्यांसाठी सुरू केलेल्या 'वाह!' या स्त्रिया आणि आरोग्य प्रशिक्षण कार्यक्रमात तथापिने संसाधन केंद्र म्हणून काम केले. त्यादरम्यान गोळा झालेली सर्व संसाधने आणि माहितीतून प्रेरणा घेत स्त्रिया आणि आरोग्य या विषयावरील संसाधने कार्यकर्त्यांना एकाच छताखाली मिळावीत यासाठी तथापिने संसाधन केंद्र सुरू केले.

तेव्हापासून पुढील २० वर्षांहून अधिक काळ तथापिने आरोग्य, हिंसा, समानता, लैंगिकता आणि अपंगत्व अशा विविध विषयांवर मराठी, हिंदी व इंग्रजीमध्ये विविध स्वरुपाची संसाधने तयार केली. गावपातळीवर आणि शहरी वस्त्यांमध्ये काम करत असताना तिथे समोर आलेल्या प्रश्नांवर आम्ही माहिती गोळा करत राहिलो. प्रशिक्षणांमधून, कार्यकर्त्यांच्या, स्त्री-पुरुषांच्या अनुभवातून शिकत शास्त्रीय दृष्टीकोनातून स्त्रियांच्या आरोग्याकडे, सामुदायिक आरोग्याकडे पाहत जनस्नेही आणि स्त्रीकेंद्री संसाधने तयार करत राहिलो.

गावपातळीवर काम करणाऱ्या कार्यकर्त्यांना सहज समजतील, आपल्या कामात वापरता येतील, स्त्रीकेंद्री दृष्टीकोन देतील अशा पुस्तिका, पोस्टर, प्रशिक्षण साहित्य, मार्गदर्शक पुस्तके, मॉडेल तथापिने तयार केली आणि ती अतिशय लोकप्रिय ठरली. अनेक प्रकाशने शासनातर्फे वितरित केली गेली.

अधिक माहितीसाठी tathapi[at]gmail.com या ई-मेल वर संपर्क साधा.